一部一驚心

 7:00上酒店 13 樓食早餐，蜂蜂著酒店拖鞋唔俾入，要返去換鞋。以為係自助早餐，點知係一個套餐，龜龜美式，蜂蜂日式。  8:38 坐 JR 去大濠公園， 8:53 步出 3號出口，出咗地鐵行兩三分鐘昨晚個湖已在眼前，沿湖慢步，橙色浮見堂庭一對情侶影緊相，此庭休息欣賞湖景很寫意，湖面成群鴨鴨𣈱游，公園高大的松樹形成一片片綠蔭，乘涼遮陰好地方。 行咗一圈出去，過馬路上斜路去西公園，斜坡有教練帶住幾個學生做訓練，教練一聲令下，幾個學生起跑，短綫衝刺。西公園最高處係光雲神社，有人群做更一的儀式，藩主嘅高大銅像同特別嘅水牛頭盔好吸晴，隨便走又見到狐神社，有個女人係度打掃，蜂蜂唔好意思坐低影相，怕人哋覺得對神靈不敬。 路邊大型畫唔知想表達啲咩？有貓、狗、魚、熊、生滿毛毛嘅人，顏色鮮艷畫風大膽。再向下走見到母女黑貓，呢度又有神社，路邊攀藤植物廢屋，超有神祕感。行多兩步，咦！一塊細爛草地有架車，明太中毒😄！昨晚個架擺檔買嘢嘅小販車，原來佢住呢附近。 沿海邊走一座吹薩士風特大壁畫牆畫得好靚，返到魚巿場，冇咩好睇，龜龜買咗真空包裝八爪魚同魚。11:26 揀咗間多人嘅餐廳食刺身定食。13:15 返到博多築紫札口出，回酒店攞行李再坐 JR 去福岡空港再轉國際線機場巴士，一出地鐵站已有巴士，好多人，呢度啲巴士明知去機場都冇設計放行李位，人流將我哋逼去兩卡車嘅接駁位😅。此時傳來車上廣播，話此位危險不適站立，只見腳下個半圓會轉來轉去，係有可能跌親，幽靈之旅咁就結束。🤣⋯⋯

6:00 醒咗，龜龜出露台見到紅霞，太陽 6:30 開始慢慢係海上雲層中升起，今日坐飛機飛返福岡，昨日前日最緊要嘅兩日都有雨😹。9:33 分嘅巴士去機場。忘記巴士沒有找贖，又忘記換 1000 圓紙幣，搞到蜂蜂下車後要飛奔到機場商店換 1000 圓，巴士司機面露不悅。 14:35 到達 MIYAKO 酒店，房間好大，對住博多車站，只見大量人群好似跪喺車站唔知做乜，邪教！ 15:21 到大濠公園一出地鐵見到有魚市場，20 分鐘行到去發現係寫字樓，魚市場可能早上才在最底層開，有郵局龜龜又走咗入去買郵票。16:13 入咗間似車仔面檔嘅小店食拉麵，元祖長浜屋一間歷史悠久的麵檔，開咗 64 年，個茶壺好大但綠茶凍晒，麵的湯唔夠熱，豬肉片碎好咸，超多葱花，紅色姜絲好好味，麵好新鮮。佢廚房好大間開放式，左手邊個係運輸帶洗碗機，店員全部係南亞男士。     然後向前去到超市、二樓有護膚化妝品、三樓好似 12 蚊店的鋪頭買咗幾樣野但買單先 440 圓，買咗盒刺身行去公園，公園入口兩旁種滿荷花，但已冇花了，園內係一個又一個草地，搵咗個冇人嘅草地邊梯級位食刺身，哈哈⋯⋯冇垃圾桶只好去廁所清潔，仲要拎住個垃圾通街走。頭先搵唔到凳，原來廁所側邊有，過馬路穿過民宅 ，18:30 去到湖邊，湖對面藍色橙色燈光倒影湖面，好靚！好多人跑步、散步，呢度未夠 18:00 就天黑了。  游完湖去搵嘢食，行行下又返到元祖長浜屋條街，路邊有四檔路邊攤坐晒人，衝過馬路去到蜂蜂想食海膽嘅小巷，發現只有兩間鋪開門，而且門口冇價錢都係放棄好了。19:30 搵咗元祖長浜屋隔離鋪， 燒螺、扇貝、蝦，一份海膽、自助壽司食，的貝殼類勁鮮！

7:30 過去食自助早餐，枱面已擺定一細舊鯖魚、餃子，嘩😳唔係自助咩？另一邊自助位有白飯、紫菜、醃青瓜、黃蘿蔔、梅、味噌湯、牛角酥、小面包、乳酪、罐頭雜果，茶、咖啡、牛奶、橙汁，相當飽肚的食物。 排完毒衝過馬路去花店買便當🍱、咖啡、水，9:32 坐巴士向白谷雲水峽出發，等巴士期間發現前面有間木製品店，比我地睇開個間便宜。10:04 係小原町落車再轉車去白谷雲水峽 10:20 車。10:50到達，噢😦條褲濕咗嘅？漏水？原來個便當有汁流出來，龜龜提議用屎袋裝住。哈哈😂⋯⋯的 白谷雲水峽小木屋買咗票先，路邊就可見到大瀑布，水花四濺，好清涼。我們踩著大岩石上山，行兩三分鐘已見古杉加漂亮的青苔，仲有隻腳腳勁長的盲蛛。左邊有吊橋，龜龜影完相揀咗右邊梯級向上走，第一棵彌生杉麻麻，仲要原路出番去大路，呢度浪費咗唔少時間。 第二棵二代大杉唔錯樹高 32m 底部樹乾個大洞蜂蜂可以爬入去探秘👍🏼，可以近距離睇到舊杉已枯死如何生出第二代，前面嘅觀景平枱係木，可以俾我哋坐低食便當，冇人冇蚊冇蟲，👍🏼。呢度向前行，好快見到夫妻杉品種的樹，佢似八爪魚咁趴喺度，滑碌碌天然打磨土黃色軟體生物，隨便走到處都是蕨類、苔蘚，摸上去軟棉棉好多水份，廢樹桿、岩石、有生命的樹到處都被佢哋包圍，神秘又漂亮。 呢條路佈滿生青苔嘅大杉樹，大樹根，目不暇給，不知不覺行到去三本足杉，樹高 24.2m，三隻樹桿似人類劈🦵腿張開好遠，旁邊有溪，我哋需踩著石春過溪，如果冇指示絕對唔知如何前進。廢木、石頭、溪水、樹根、爛泥、枯葉形成原生林步道，同香港用磚砌成的步道好唔同。 繼續往深處走，幽靈村莊出現🤓，錯縱複雜的樹根落葉路，兩邊有三間超大樹屋生滿青苔，再向前少少有條小橋，溪水係青苔石頭上流過，被青苔重重包圍嘅拱門，童話世界一樣。之後仲有三本槍杉、奉行杉、二代杉、七本杉、女神杉，已冇時間慢慢欣賞。 途中遇到上山時嘅北方一家三口，爸爸話以我哋個速度去唔到太鼓岩，14:30 開始衝上太鼓岩，我哋飛奔登頂，三秒打卡即走，一舊大石望遠景，冇咩特別。衝、衝、衝⋯⋯小跑飛奔下山總算可以 15:40 衝到巴士位等 16:10 最後一班車，等車期間見三個露營者，有一個帶住導遊牌，團友只有兩個人，原來呢啲都可以開團。 巴士開開下 16:30 馬路出現🐒，司機專登停一停俾遊客影相，我哋直接坐到碼頭總站先落車，個碼頭冇咩好睇，返轉

凌晨三點幾起身，龜龜食咗紅豆包，蜂蜂食咖哩包。行出馬路巴士站，天太黑巴士牌冇燈行過龍又返轉頭，咦！巨型機動車停車場，就係呢度了。見巴士就揮手佢不停，反而去咗我哋酒店門口停，我哋飛奔而去被司機告知不是呢架。呢架應該係報咗團個的人上嘅，我哋酒店好多人上咗去。 又回來巴士站，4:36 又截停咗架巴士。上車後肥佬又話我哋唔可以坐呢架，要收錢 640 日圓 一個人。呢架應該係酒店職員講嘅班車，屋久島的交通都幾煩，有唔同公司啲巴士，我哋誤會咗係我哋買三日票的巴士公司。繼續等由碼頭四點幾開出巴士，5:20 來到我哋呢個站，希望架車準時啦！ Yeah ✌🏻準時到咗，成架車都冇人，去到屋久杉自然館全程只有八個人上車。落車買票兩人4800 日圓，售票員講個背囊可以咩咩咩😅聽唔明，跟住有個北京友行埋嚟話：背包可以放地下，當排隊用。哈哈⋯⋯唔怪得地下全部都係包包啦！ 5:40 開車上山去荒川登山入口，落雨。6:20 開始這個 20 公里、耗時 10 小時嘅長征，廢棄鐵軌🛤️就在這停車場邊，沿着鐵軌行五分鐘左右就穿過山洞，山洞後都係沿鐵軌行，深山裏有廢棄嘅小學，依家只係一塊冇大樹的平地。一旁有個休息亭，有瓦遮頭，之後的路唔會有了，龜龜決定係度食嘢。 便當係酒店為我哋准備，四個便當 1400 日圓，我食個份有兩個飯團🍙、兩舊炸雞、一舊炸土豆、一個麻薯，龜龜有靖魚、炸番薯、飯團、麻薯，味道唔錯。特別係飯團中間個粒紅色小脆梅，炸嘢凍左就差的。俾龜龜試吓我舊炸土豆，可愛的龜龜話：你舊番薯軟身過我個舊好多，😹😹我舊係土豆而不是番薯。 8:02 見到三代杉，黑蒙蒙嘅樹洞睇唔出點算三代。繼續行廢鐵軼，鐵路係舊時為砍杉樹運輸而誕生，唔知行咗幾多個鐘，見有個向右分叉路口寫去繩文杉，就開始向上爬石頭路。踩著又大又長遍地橫生的樹根趕路，高底起伏。古老樹根石頭路加埋一直落雨仲要趕路趕車，都幾辛苦，但卻好壯觀。 抬頭不見天日，樹木好高，加埋多雨水先至咁多青苔。沿途都有好多導遊，一個導遊帶兩三個客登山。第一棵遇到啲係翁杉、一棵雜草叢生的枯樹枝，樹徑大外型睇唔出似老翁，太多雜草，第二棵遇到心形樹洞，靚、大、蜂蜂想入去，但洞內個對北京情侣狂影相加埋雨勢大，龜龜叫我繼續趕路，第三棵大王杉，好高。 第四棵夫妻杉、呢棵好特別，土黃色樹桿，兩棵樹連埋一起，摸上去滑碌碌，而且就在路邊，正。衝呀！時間緊迫，向繩文杉衝，繩文

7:30 familymart 食早餐，龜龜又食油麪，蜂蜂又食飯團。又見到左手邊白色襯衫的男人飲住杯凍啡改功課，昨日坐喺我後面個中年肥佬又係度，前方十字路口咖啡色袋嘅西裝友今日換咗對黑皮鞋等緊過馬路，馬路中又出現豆零爭肥婆拎住兩袋嘢過更馬路。 返酒店排完毒去咗個神社行下，裡面有個藩主家族，墳墓好多蚊，墳上有幾個大石疊埋一齊做裝飾，旁邊嘅五重塔顏色鮮艷，隔離個小廟有串超大佛珠，一拉佢就劈叻拍啦，好似放炮仗。大樹下個僧人係碎沙石中掃落葉仲要用手一塊塊手執起的葉。 10:00 坐車去空港線內陸機福岡去屋久島，10:45 喺機場食牛餐，牛牛飯，入閘之後行下商鋪，國內線店鋪多。去到車81你號閘口先知仲要坐接駁巴士好彩早少少落去，細架短腳螺旋掌內陸機，巴士都大過佢。14:00 到達屋久島機場，好細好舊好少人，落機徒步出到去，行李都係人手攞落嚟嘅。 兩點幾上咗巴士，點知錯咗方向只好係下一個站落車，一落車就係小瀬田郵局，可能冥冥中有注定，龜龜搵咗幾日郵局都未搵到咁樣俾佢撞中🤪。要等一小時先有環島巴士，寫下明信卡食下明太子、帶子裙邊時間都過得好快。有兩個男人同我地一樣坐錯車一齊係小瀬田站等。 15:30 上巴士又去返機場，唔同方向的巴士係同一站停，玩嘢😅。去到 Green 酒店開始落雨，和風式間房好靚大花園加全海景，露台有化妝枱，放好行李出去行吓，咦好大雨。一過馬路就有間花店，埋邊有青菜、水果、調味料、酒、便當，日用品賣，老細係個中午大叔好好笑容。冒雨繼續行咗去間手信店，好大間，的屋久杉手工品價格不菲，有毛巾、衫、明信片、草餅、咖哩、包裝魚賣，18:00 酒店食晚飯所以行咗一陣間就返轉頭。 晚餐相當豐富，炸飛魚、凍蟹（旭蟹），龜龜話似草苺，凍九爪螺、魚魚刺身、酒、豚肉、甜品、正😄⋯⋯

晴天。星期一。溫度舒適似秋天，7:00 起身行兩三分鐘去 Family mart 食早餐，龜龜食炒油麪加咖啡、蜂蜂食明太子飯團加咖啡，坐喺轉角吧枱望住人來人往的紅綠燈十字路口，日本人的穿裝髮型都好企理🤪連昨晚河邊個露宿者都唔算太污糟。坐喺我身邊的幾個食早餐的人好奇怪，由我哋來到食完走佢地都仲係度，唔使返工咩？ 排完毒行去JR，條路好多人，似香港返工一樣，我哋逆流而上🤓，福岡都算大城市，返工時間擁擠都正常。8:43 買票 8:50 上車，總站門司港，下車的人流勁多😹喪屍列車，車廂溫度熱過室外。坐咗個來鐘車到達，一落車眼前就係古老的建築，木材唔知經歷咗幾多個春秋，連燈都超古老，正門是古老洋式建築，也很漂亮，門前的噴水池冇噴水。 人少、藍天白雲海邊漫游超正，坐喺海邊飲下嘢吹下水，但有隻船排放的廢氣油味好臭，有名的藍翼橋，一群人等緊橋合埋過去對面。海邊有商舖食肆並不吸引，龜龜被海邊兩條香蕉人吸引。行多幾步去到北九州市立國際友好紀念圖書館，係一座複製中國大連的歐式建築物兩三層樓高，似迪士尼城堡，空蕩蕩冇人，埋邊有間中式餐廳開咗門，其他冇開。 路邊有架昭和 15 年既火車俾人任影唔嬲，可惜冇得上車廂。再行睇個樣都唔似有食肆，11:42 喺一間家庭式餐廳開餐，二代目清美食堂，兩層嘅小村屋，呢度的人好大食，的套餐有飯又有麪，店里有個大煲，煲內有大塊豆腐、牛雜，龜龜自己裝咗塊豆腐配黃芥辣，噢！豆腐好入味配黃芥辣有創意，其實可能係配牛雜用😹龜龜搞錯左。枱面任用辣椒醬勁好味，青檸皮加青椒攪碎物體，蜂蜂個套餐係咖喱飯配豚肉芽菜拉麵，龜龜係豚肉芽菜拉麵配白飯醃蘿蔔加咖啡，咖啡配一小包朱古力。呢度唔興搭枱，好多人來咗見冇位就走了，客全部都係本地人、地盤工、師奶、西裝友生意超好嘅夫妻檔。12:20 飲食完一出門口，嘩！好多男人等位，唔通呢度冇限時間食午餐？如果香港午餐，一小時等到夠鐘返工都冇得食。 沿着海邊走有廢鐵軌、有神社、按摩背脊椅、八爪魚🐙滑梯。咦！個廁所圓形冇門嘅，開放式馬路對面都可見到嘅兩個尿兜，大便房有門，個 40 來歲的男人痾緊尿，仲係男女共用。行多幾百米很快去到海底隧道入口，搭乘電梯落去，入口處有當地的景點介紹及印章任玩，真的就是一條人行隧道，兩邊都是牆，牆上有的魚魚裝飾，冇太大震憾，只能靠想像，想像自己在海底下 58 公尺的地方，不過都佩服日本人喺 1958 年就可以

5:30 就俾龜龜吵醒，搞掂啲嘢出發去機場。8:00 已搞掂晒登機入閘，上網提前登記真係快好多，4月去時沒有自助寄行李服務依家已有，連出境都不用身份證手指模，人臉識別就可以🤓。早餐揀咗滿泰，的奶茶嘢食都似足太興，蜂蜂個扎肉豬扒包新鮮好味，龜龜個火腿通粉味精入曬晒、炒蛋都相當唔錯👍🏼。 10:20 班機去福岡，閘口 8 號臨時改咗 11 號閘，連時間都改埋 10:45 先登機，識龜龜 7 年第一次係店舖買機票而不是佢自己上網買。蜂蜂就第一次試吓 SoSIM 的日本外遊數據，$60 用 7 日，但要開通 Volte。我手機只有 Lte🤪希望 OK 啦！坐喺度等夠鐘，候機閘附近座椅上的 USB 充電口十個有九個都係壞嘅，蜂蜂龜龜四圍插先搵到一個可以充到電。 話咁快，15:30 就到福罔 ，坐火車去博多兩個站，博多 APA 酒店離車站很近，短短距離有很多間 ，自助辦理入住手續出房卡，放底行李就落街。隨便走有幾間公園，但已關門，承天寺的松樹很漂亮。17:35 吃晚飯，自助買飯，龜龜去裝茶居然裝了白飯返來，再去又裝咗杯柴魚湯，蜂蜂自己出去龜龜跟埋終於問侍應先裝咗杯茶返來，原來咖啡都係免費，仲係 24 小時營業，價錢便味道好，坐得又舒服，仲有送餐機器人，正！ 隨便走去到 Aeon 超市，買了柿、啤酒、薯片、杯麵、明太子、咖啡。過斑馬綫後，咦！有家神社冇關門，門口有個超高巨型神轎都幾驚嚇🙀，係要人力抬起，原來佢叫做櫛田神社，個園區都幾大，可能係福岡市中心緣故，園內有唔少人在拍照拜神，另一個門口有個巨型大燈籠🏮仲有個圓形⭕️十二生肖圖係頭頂，幾靚。出咗神社沿商店街走了一圈，人流少店鋪買的東西也不吸引，呢度的店好鍾意賣啲黑嫲嫲的好似燒黑咗的雞油的東東，唔知係咪烏雞油呢？食肆人流都少。 沿河邊回車站，有個露宿者瞓係石板凳上，夜晚會好凍，隨便走走就去到博多車站，附近有大型商場，廣場有小摊位，有很多酒賣，很多人在飲酒食嘢很熱閙。商場行吓冇咩好睇，返酒店的途中隨街都係酒店多到嚇死人，20:18 回酒店。

5:00 起身去廚房刷牙時，天花板一陣巨響，啊 ⋯ 一隻好似老鼠咁大嘅四腳蛇飛奔，今朝的咖啡唔太苦，隻貓晨早走咗出嚟送客， 5:45 車已到，係 機場接我地那個司機，佢手車揸得穩好多。 包租婆包租公 5:50 已等住檢查房間，房得兩張床有咩好檢查，廚房係共用嘅檢查來有咩意思？呢對英國夫妻俾蜂蜂感覺好唔舒服成個 CCTV咁 ，討厭！ 七人車一開出就見到日出   ，正！車車行咗一段時間路經一個小鎮，嘩！好大火，路邊攤唔知賣咩呢？就係 7-11 門口停車，去 7-11 買咗支咖啡再行出搵大火路邊攤，麫包鋪麫包好吸引，買咗一大堆，又喺大火嗰度買咗的好似白糖糕的東東，炸雞、炸雞！ 路邊有啱啱炸更新鮮熱辣辣炸雞，蜂蜂揀咗幾隻長形嘅以為係雞髀。點知係雞頸，咦 ⋯⋯ 我哋嘅早餐真豐富。 9:30 到機場 2 號大樓，門口有個保安，啊？要俾護照佢睇先可入去，細機場入境上機都好易搵。咁就結束 5 日旅程，沙丁魚很壯觀但可惜冇得親密接觸，海龜好可憐被人圍攻，最放鬆舒適係嘉華山，Osmena Peak都唔錯但人多地細又冇得自己亂行，的人個個都話菲律賓的野食唔好食，但蜂蜂覺得唔錯 👍🏼 特別係平價炸雞好好味 😋 。  

6:30 醒咗， 昨晚有 蚊帳 總於不再咬醒   ，早餐本地青菜、墨魚仔、本地即食麫，狗狗貓貓圍住晒食早餐送行。 10:13 車都未到，包租婆係門口張望話架車會遲。 10:30 出發遲咗半小時，個司機車人去嘉華山所以遲又唔出聲。 今日龜龜預約咗架七 人車，車向住卡娃山方向駛去，龜龜蜂蜂心諗唔通又去返嘉華山瀑布？去多次都唔錯。確實幾靚嘅，同埋附近都幾好行景色又優美。車車直接駛過嘉華山地段，沿着彎彎曲曲曲崎嶇山路開呀開， 11:30 開到一個做緊水渠工程的路邊，簡陋小屋里行出兩個細路。一個 11 歲一個 16 歲居然由兩個童工帶我地去搵瀑布，山林小徑行咗 10 分鐘去到溪邊小木屋，埋邊有零食救生衣，蜂蜂租咗一件，繼續向前行。 12:00 到瀑布，呢度係的本地人自己玩嘅，的人係度擦晒 番梘 搓到成身泡泡跟住跳落水。除咗我哋仲有一對外籍情侶，手肘有傷口似騎電單車跌親，佢哋冇落水玩。司機俾一個鐘時間我哋玩 13:00 要落山，龜龜蜂蜂游咗陣間。落山時見到摩托車，居然係的碎石、好窄的山路行駛，的車輪應該壞的好快。 14:00 到Osmena Peak山腳，搵咗間小店食午餐，兩個炸雞 🍗 飯，咖啡唔好飲，服務員廚師係同一個人，老板娘的廚藝麻麻，因為頭先落咗水成身濕晒二樓的風吹得蜂蜂打冷震。登頂入口要收錢先，俾完錢，司機叫我地一個鐘就落山，龜龜話講好咗係來睇日落，叫司機自己打去俾草屋包租婆問，經過一輪口舌之爭最後兩小時要落山。個司機好奸，由頭到尾都係趕鴨仔，唔安排我哋食午餐車又揸的超快坐到蜂蜂做嘔，又趕我哋快啲上山落山咁佢自己賺咗錢話知你死。 14:30 開始上山，呢度全部都種晒菜，個導遊係個六十幾歲 臃腫 大媽。上山的路好簡單直上就可到山頂，十來廿分鐘就攻頂，導遊大媽又係經過專業訓練影相，叫我地呢樣個樣就晒位。一眼望去周圍都係大大細細嘅小山丘，圓圓地，我哋企嘅石似火山岩石，附近冇乜好行，靜雞雞坐喺度享受下。靜咗一陣已有一批又一批的旅客上晒來，其中有三個香港男子，影相影咗好耐。 16:25 下山，路邊有 $20/ Kg 的青菜好抵買，大媽買完青菜又買好細個的小椰菜。回程的途中奸人司機無端端係一個碎石大平地停車叫我地出去影相，又係馬路邊的山凹出嚟的位停車，最後一次停車的位太陽落更山，因為佢想補鑊。男人老狗居然話個太太有睇信息，佢冇睇到所以唔知我哋個行程在山頂睇日落。一路的景色都唔吸

5 點幾痕醒咗，起身洗碗俾龜龜煮麫加罐頭、番茄做早餐， 7:45 三輪單車到， 8:00 出發 Kawasan  。途經兩個市集， 大規模原隻燒雞不斷轉轉轉、勁大塊燒豬腩肉香味四溢，快到嘉華山的路景以海為主，水很清澈，一望無際，正！       8:40 到達填表格，小店就在路邊，佢有提供鞋及救生衣、頭盔。由 當地的 Tour 帶領溯 溪以及跳水行程， 穿好裝備行出馬路坐摩托車，點知個工作人員叫我地同一塊牌及佢三個一齊影相。之後龜龜蜂蜂加司機三個一架車向山上出發。大約 20 分鐘左右車程，玩飛索前要好隨便咁填下資料，飛索可以減少行山，填寫好再行兩步到入口又要再填，求其寫個名就可以完全為咗做樣。企定個人，戴上安全帽，套上 黑色圍裙然後身體前傾 ，工作人員就托起蜂蜂、龜龜雙腿，趴下變咗兩隻 🐛🐛 哈哈 😄 ⋯⋯ 呢個姿勢 俯視 山林，驚驚 😨 啊啊 ⋯⋯ 雙手捉緊龜龜，好快到對面，全程導遊幫手揸 GoPro 幫我地錄影。 起點上梯級，係條山林小徑， 15 至 20 分鐘已聽到好吵嘅人聲，的人已跳緊水。 溯溪 就溯得多，溪降沒試過，哈哈 😄 ⋯⋯ 溪水清澈 顏色像美瑛青池，好美噢！ 沿路的風光都很美。 戴 着头盔，穿着救生衣， 係 峡谷的河流里徒步， 石頭上 攀爬， 瞓低係溪中頭先入水滑落去溪中，有啲位要 高處跳入深潭， 龜龜溪降眼鏡 跌咗落去 ，即時向導游求助，好彩搵得返，但係另一個導遊幫手潛入去搵返，抬頭向上望會感受到峽道的高而壯麗，同香港的溪好唔同，呢度好原始壯觀，岩石都很不一樣。 行下跳下 一直往前進 ，去到賣燒嘢的峽谷位，冇人幫襯，龜龜買咗五花腩、腸腸，的顏色好紅，五花腩好味甜甜酸酸肥肉好香，粉腸唔新鮮霉咗。呢個應該係全程溪降嘅最高位，龜龜跳咗落去，蜂蜂想跳但一行到懸崖又好驚啊，來來去去幾次最後選擇放棄。之後的路越嚟越平坦少水，咦！睇電視介紹有一個好似盪千秋的跳水位點解唔見嘅？唔通過咗？ 順著溪流繼續走，千秋出現了 😄 ，呢個位係人工堆砌而成，較大而平坦安全，似森林中的泳池，水面浮著不少旅客，嘻嘻哈哈一片笑聲。爬上跳水枱，用手捉實掛在樹上的千秋棍，啊啊啊 ⋯⋯ 飛咗出去，好驚嘅蜂蜂唔敢放手又彈回跳水台再次飛出去，基於眾人眼望望唔係幾好意思只好放手，放手一刻心跳加速跳咗出嚟。蹦一聲成個人沉咗入溪再浮返上面。 以為呢啲已經係尾聲，行行吓仲有幾個壯觀的瀑布